İtkin neftçilərin axtarışı: əməliyyatlar gücləndirilib
Dövlət Dəniz Administrasiyasında Fövqəladə Hallar Nazirliyi, Müdafiə Nazirliyi, Dövlət Sərhəd Xidməti, SOCAR və Azərbaycan Xəzər Dəniz Gəmiçiliyi ilə birgə yaradılan qərargah Xəzərdə itkin düşmüş neftçilərin axtarışı ilə bağlı yeni açıqlama yayıb.
Ötən il dekabrın 15-də güclü külək “Azneft” İstehsalat Birliyinin neft yığım məntəqələrinin birində estakadanı dənizə uçurub, 10 neftçi batıb. Onlardan 1-nin meyiti tapılıb.
Novator.az bildirir ki, qərargahın 5 yanvar məlumatına görə, estakadanın dağıldığı ərazidə suyun dibində dağıntıların təmizlənməsi prosesi davam etdirilir: “Axtarış-xilasetmə əməliyyatlarının həyata keçirildiyi ərazidə suüstü və sualtı maneələr, yaşayış olmayan çoxlu kiçik adanın mövcudluğu nəzərə alınaraq sualtı və suüstü axtarış-xilasetmə əməliyyatlarının gücləndirilməsi barədə qərar qəbul edilib. Əraziyə cəlb edilən canlı qüvvə, gəmi və digər üzən vasitələr, helikopterlər, dalğıclar sahilboyu və digər çətin keçilən ərazilərdə axtarış-xilasetmə əməliyyatlarını fasiləsiz olaraq həyata keçirməkdədir”.
