Bakıda tikinti məhdudiyyətləri
Bakıda mühəndis-kommunikasiya təminatı obyektlərinin normal fəaliyyətinin təmin olunması ilə bağlı məhdudiyyət qüvvəyə minib. Yanvarın 1-dən yerli icra hakimiyyəti orqanlarının bələdiyyə mülkiyyətində olan torpaq sahələrinin ayrılması üçün torpaq sahəsinin xüsusiyyətinə və torpağın ayrılma məqsədinə, mövcud texniki normalara, habelə yerquruluşu və şəhərsalma, ərazi planlaşdırılması sənədlərinə uyğunluğu baxımından rəy verməsi müvəqqəti dayandırılıb.
Novator.az bildirir ki, prezident fərmanında Bakı şəhərində əhalinin sayının artmasının, çoxlu sayda müxtəlif təyinatlı binaların və obyektlərin tikintisinin, xüsusilə də böyük sayda fərdi yaşayış evlərinin inşasının şəhər təsərrüfatına, onun infrastrukturuna, o cümlədən mühəndis-kommunikasiya təminatı obyektlərinə düşən yükü dəfələrlə artırdığı vurğulanır. Qeyd olunur ki, şəhərdə bir sıra mühəndis-kommunikasiya, o cümlədən yağış kanalizasiya sistemlərinin hazırkı inkişaf vəziyyəti və şəhər təsərrüfatının tələblərinə cavab verən səviyyəyə çatdırılması üçün təkmilləşdirilməsi bəzi məhdudlaşdırma tədbirləri də daxil olmaqla əlavə və uzunmüddətli işlərin görülməsini tələb edir.
Prezident İlham Əliyevin Dövlət Şəhərsalma və Arxitektura Komitəsinə, yerli icra hakimiyyəti orqanlarına verdiyi tapşırıqda, Bakı şəhərinin inzibati ərazi vahidi hüdudlarında təşkil olunmuş bələdiyyələrə tövsiyəsində həyətyanı torpaq sahələri olan yaşayış evləri tikiləcək zonaların planlaşdırılmasına yol verilməməsi qeyd olunur.
“Azərkosmos” Açıq Səhmdar Cəmiyyəti martın 1-dək Bakı şəhərinin ərazisinin peyk təsviri vasitəsilə ortofotolarının hazırlanmasını təmin etməlidir.
Bakı Şəhər İcra Hakimiyyəti tikinti üçün mülkiyyətə bu fərman qüvvəyə mindikdən sonra ayrılmış torpaq sahələrində tikinti obyektinin inşasının aparıldığını aşkar etdikdə tikinti işlərinin dayandırılması üçün dövlət şəhərsalma nəzarəti qaydasında müəyyən edilmiş tədbirlər görməlidir.
