İsveçrə əcnəbi müştəriləri üçün bank sirrini ləğv edir
İsveçrə 2017-ci il yanvarın 1-dən əcnəbi müştəriləri üçün bank sirrini ləğv edəcək. Bu, vergidən yayınan şəxslərə qarşı mübarizəni gücləndirmək məqsədi daşıyır.
AZƏRTAC-ın məlumatına görə, gələn ilin əvvəlindən başlayaraq yerli rəsmi qurumlar əcnəbi müştərilərin məlumatları və bank hesabları ilə bağlı sorğulara cavab ala biləcəklər. 2018-ci ildən isə xarici ölkələrin vergi orqanları ilə informasiya mübadiləsi mümkün olacaq.
“Qara” pulların yatırılması üçün dünyada ad qazanan İsveçrə beynəlxalq təzyiqi nəzərə alaraq bir il bundan əvvəl avtomatik informasiya mübadiləsi sisteminə qoşulacağını bəyan edib. Həmin sistemə dünyanın artıq 100-dən çox ölkəsi qoşulub.
Yeni sistemin şərtlərinə görə, gələn ilin əvvəlindən başlayaraq İsveçrə bankları əcnəbi müştərilərin bank hesabları ilə bağlı bütün məlumatları, eləcə də hesablardakı vəsaitin verdiyi mənfəəti yerli maliyyə qurumlarına bildirməlidirlər. Həmin məlumatların mübadiləsi isə hər il bu sistemə qoşulmuş ölkələr arasında aparılacaq. Bununla da avtomatik informasiya mübadiləsi sisteminə qoşulmuş dövlətlər öz vətəndaşlarının İsveçrədə, eləcə də digər ölkələrdə bank hesablarının olub-olmaması haqqında məlumat əldə edəcəklər.
