Azərbaycan əsgərinin həlak olduğu bilinib
Dekabrın 30-da Azərbaycanın Müdafiə Nazirliyi açıqlama yayıb. Qeyd olunur ki, ermənilər sosial şəbəkələrdə Azərbaycan əsgərinin meyitinin fotolarını paylaşıb.
Ötən gün Ermənistan Silahlı Qüvvələrinin kəşfiyyat qrupu Azərbaycan-Ermənistan dövlət sərhədini pozmağa cəhd göstərib. Müdafiə Nazirliyinin məlumatına görə, döyüş toqquşması zamanı düşmən canlı qüvvə sarıdan xeyli itki verərək geri çəkilməyə məcbur edilib, Azərbaycan Silahlı Qüvvələrinin hərbi qulluqçusu əsgər Qurbanov Çingiz Salman oğlu isə itkin düşüb.
30 dekabr məlumatında Müdafiə Nazirliyi bildirir ki, erməni tərəfi əvvəlcə meyitin onlarda olmadığını bildirsə də, həyata keçirilən müvafiq tədbirlər və əldə edilən təkzibolunmaz dəlillər qarşısında məcbur qalaraq əsgərin meyitinin fotolarını sosial şəbəkə vasitəsilə yayıb: “Təxribatın qarşısını alarkən həlak olan və düşmən nəzarətindəki ərazidə qalan əsgər Qurbanov Çingiz Salman oğlunun meyitinin geri qaytarılması ilə bağlı Beynəlxalq Qızıl Xaç Komitəsinin Azərbaycan nümayəndəliyinə, ATƏT-in Minsk qrupuna, o cümlədən ATƏT-in fəaliyyətdə olan sədrinin şəxsi nümayəndəsi Anjey Kasprşikə rəsmi qaydada müraciət edilib.
Təəssüflər olsun ki, Ermənistan növbəti dəfə beynəlxalq qurumların nümayəndələrini aldadaraq bu hadisədən yenidən öz çirkin əməlləri üçün istifadə etməklə Azərbaycan xalqına qarşı qeyri-insani simasını nümayiş etdirir. Hazırda müvafiq qurumlarla birgə hərbi qulluqçumuzun meyitinin Azərbaycan tərəfinə qaytarılması istiqamətdə işlər davam etdirilir”.
