Əmlakın asan qeydiyyatı: bu il 28 kampaniya keçirilib
Əmlak Məsələləri Dövlət Komitəsi daşınmaz əmlakın asan qeydiyyatı – “kütləvi çıxarış” kampaniyası ilə bağlı yeni məlumat yayıb. Dekabrın 29-u Mingəçevir şəhərində keçirilən növbəti kampaniyada çoxmərtəbəli binanın bütün mənzilləri yerindəcə sənədləşdirilib. Binanın həyətində 110 mənzil sahibinə hazır çıxarışlar təqdim edilib.
“Kütləvi çıxarış” kampaniyası çərçivəsində müxtəlif yaşayış məntəqələrində, birbaşa ünvanlarda əmlakın qeydiyyatı üçün tələb olunan sənədlər – aktlar, şəhadətnamələr, qeydiyyat vərəqələri, kolxoz və sovxoz əmrləri, sovet dövründə verilmiş müxtəlif tipli mülkiyyət sənədləri və texniki pasportlar toplanır. Sonra vətəndaşlara məxsus fərdi yaşayış evləri, pay torpağı, mənzillər, həyətyanı torpaq sahələrinə dair hazır çıxarışlar təqdim olunur.
2016-cı ildə Əmlak Məsələləri Dövlət Komitəsi ölkə üzrə 28 kampaniya keçirib. Bunun 6-sı paytaxtın rayonlarında, 22-si isə müxtəlif şəhər və rayonlarda baş tutub.
