Dövlətə məxsus hüquqi şəxslərin borc alması qaydası təsdiqlənib
Prezident İlham Əliyev dekabrın 29-da fərman imzalayaraq dövlətə məxsus hüquqi şəxslərin daxili və xarici borc alması qaydasını təsdiq edilib. Novator.az bildirir ki, sənəd dövlətə məxsus hüquqi şəxslərin daxili və xarici borc almaları və borcun yuxarı həddi ilə bağlı münasibətləri tənzimləyir.
Dövlətə məxsus hüquqi şəxslər dedikdə paylarının (səhmlərinin) 51 və daha artıq faizi birbaşa və ya dolayısı ilə dövlətdə olan səhmdar cəmiyyəti, məhdud məsuliyyətli cəmiyyət və digər təşkilati-hüquqi formada fəaliyyət göstərən kommersiya hüquqi şəxslər; dövlətin yaratdığı qeyri-kommersiya hüquqi şəxslər və publik hüquqi şəxslər; qeyd edilən hüquqi şəxslərin yaratdığı, paylarının (səhmlərinin) 51 və daha artıq faizi birbaşa və ya dolayısı həmin hüquqi şəxslərə məxsus olan törəmə təsərrüfat cəmiyyəti, qeyri-kommersiya hüquqi şəxslər və publik hüquqi şəxslər nəzərdə tutulur.
Qayda paylarının (səhmlərinin) 51 və daha artıq faizi birbaşa və ya dolayısı ilə dövlətə məxsus olan bankların, bank olmayan kredit təşkilatlarının və sığorta şirkətlərinin borc almasına şamil olunmur.
Dövlətə məxsus olan hüquqi şəxslər hər il iyunun 1-dək növbəti il üzrə borc niyyətləri və borcun ümumi məbləğləri barədə məlumatı Maliyyə Nazirliyinə təqdim etməlidir. Maliyyə Nazirliyi 30 gün ərzində borc alma niyyəti barədə müraciətləri təhlil edib borc almanın yuxarı həddinə dair təkliflərini hazırlamalı və borc almanın yuxarı həddində nəzərə alınan investisiya layihələrini İqtisadiyyat Nazirliyi ilə razılaşdırıb Nazirlər Kabinetinə təqdim etməldir. Nazirlər Kabineti prezidentlə razılaşdırmaqla sentyabrın 15-dək növbəti il üçün dövlətə məxsus olan hüquqi şəxslərin borc almasının yuxarı həddinə qərar verməlidir.
Borc almanın yuxarı həddi manatla müəyyənləşdirilir.
