İkinci “qara qutu” da tapılıb
Soçi şəhəri yaxınlığında – Qara dənizdə qəzaya uğramış “Tu-154” təyyarəsinin ikinci “qara qutusu” da tapılaraq dekabrın 28-də üzə çıxarılıb. Birinci “qara qutu” dekabrın 27-də tapılıb və araşdırma üçün Hərbi Hava Qüvvələrinin Mərkəzi Elmi-Tədqiqat İnstitutuna (Moskva ətrafında yerləşir) göndərilib. Araşdırmanın ilkin nəticələrinə görə, qəzadan əvvəl təyyarənin qanad hissəsinə aid mexanizmdə problem yaranıb, bu barədə həyəcanla bilgi verən pilotun son sözü “Komandir, düşürük!” olub.
Rusiya Müdafiə Nazirliyinə məxsus sərnişin təyyarəsi dekabrın 25-i səhər qəzaya uğrayıb. Suriyaya uçan təyyarə Soçidən havaya qalxandan az sonra Qara dənizə düşüb. Təyyarənin göyərtəsində 8 heyət üzvü və 84 sərnişin (8 hərbçi, 9 jurnalist, 2 dövlət qulluqçusu, Rusiya Ordusunun Akademik Mahnı və Rəqs Ansamblının 64 üzvü və xeyriyyəçi Yelizaveta Qlinka) olub.
Qəzaya səbəb kimi mühərrikə kənar cismin düşməsi, keyfiyyətsiz yanacaq üzündən mühərrikin gücdən düşməsi və dayanması, texniki nasazlıq və idarəetmə səhvi ehtimalları araşdırılır. Terror aktı və ya diversiya istisna olunmur.
Qara dənizdə axtarışlar davam edir. İndiyədək 15 nəfərin meyiti tapılıb.
