“Qara qutu” üzə çıxdı
Qara dənizdə qəzaya uğramış “Tu-154” təyyarəsinin quyruq hissəsində olan əsas “qara qutu” dekabrın 27-si tezdən tapılaraq üzə çıxarılıb. Novator.az-ın məlumatına görə, “qara qutu” araşdırma üçün Hərbi Hava Qüvvələrinin Mərkəzi Elmi-Tədqiqat İnstitutuna (Moskva ətrafında yerləşir) göndəriləcək.
Rusiya Müdafiə Nazirliyinə məxsus sərnişin təyyarəsi dekabrın 25-i səhər qəzaya uğrayıb. Suriyaya uçan təyyarə Soçidən havaya qalxandan az sonra Qara dənizə düşüb. Təyyarənin göyərtəsində 92 nəfər – 8 heyət üzvü, 8 hərbçi, 9 jurnalist, 2 dövlət qulluqçusu, Rusiya Ordusunun Akademik Mahnı və Rəqs Ansamblının 64 üzvü və xeyriyyəçi Yelizaveta Qlinka olub.
Federal Təhlükəsizlik Xidməti təyyarənin qalıqlarına ilkin baxışda terror aktı və ya diversiya əlamətlərinin görünmədiyini bəyan edib. Qəzaya səbəb kimi mühərrikə kənar cismin düşməsi, keyfiyyətsiz yanacaq üzündən mühərrikin gücdən düşməsi və dayanması, texniki nasazlıq və idarəetmə səhvi ehtimalları araşdırılır.
Qara dənizdə axtarışlar davam edir. İndiyədək 12 nəfərin meyiti tapılıb.
