Axtarış davam edir
Dövlət Dəniz Administrasiyasında Fövqəladə Hallar Nazirliyi, Müdafiə Nazirliyi, Dövlət Sərhəd Xidməti, SOCAR və Azərbaycan Xəzər Dəniz Gəmiçiliyi ilə birgə yaradılan qərargah Xəzərdə itkin düşmüş neftçilərin axtarışı ilə bağlı yeni məlumat yayıb.
Dekabrın 15-də güclü külək “Azneft” İstehsalat Birliyinin neft yığım məntəqələrinin birində estakadanı dənizə uçurub, 10 neftçi batıb. Onlardan 1-nin meyiti tapılıb.
Qərargahın 26 dekabr məlumatına görə, 44 gəmi və üzən vasitə, 6 helikopter, Fövqəladə Hallar Nazirliyi və SOCAR-ın dalğıcları, FHN-in regional mərkəzləri və N saylı hərbi hissələrindən 191 nəfər şəxsi heyət də daxil olmaqla ümumilikdə 700-dən artıq canlı qüvvə uzunluğu 145 kilometr, eni isə 120 kilometr olan geniş ərazidə fasiləsiz axtarış-xilasetmə əməliyyatları aparır. “Məmməd Süleymanov” və “Təbriz Xəlilbəyli” gəmiləri uçmuş estakadaların ərazisində 24 saat sualtı video axtarış əməliyyatlarını davam etdirir. Axtarış-xilasetmə əməliyyatları zamanı uçan estakadaya aid olduğu ehtimal edilən 100 çeşiddən artıq əşya tapılaraq təhvil verilib.
