Qaz və işıqda yeni güzəştlər tətbiq edildi
Tarif (qiymət) Şurasının 28 noyabr 2016-cı il iclasında təbii qaz və elektrik enerjisinin satışı tariflərinə baxılmış və tənzimlənmə aparılmışdı. Təbii qazın pərakəndə satış tarifi əhali üzrə illik istehlak həcmi 1500 kubmetrədək olan istehlakçılar üçün bir kubmetr üçün 10 qəpik səviyyəsində saxlanmış, illik istehlak həcminin 1500 kubmetrdən çox olan hissəsi üçün isə 20 qəpik müəyyənləşdirilmişdi. Tariflərin 2017-ci il yanvarın 1-dən tətbiq olunmasına qərar verilib.
Elektrik enerjisinin pərakəndə satış tarifi əhali üzrə aylıq elektrik enerjisi istehlakı 250 kilovat-saatadək olan istehlakçılar üçün 7 qəpik səviyyəsində saxlanmış, aylıq istehlak həcminin 250 kilovat-saatdan çox hissəsi üçün isə 11 qəpik olmuşdu. Qərar 2016-cı il dekabrın 1-dən qüvvəyə minmişdi.
Novator.az bildirir ki, dekabrın 22-də Tarif (qiymət) Şurası prezident İlham Əliyevin tapşırığı ilə növbədənkənar iclas keçirib. Şuranın iclasında əhali üzrə tarifi dəyişməyən təbii qaz üçün təsdiqlənmiş illik istehlak həcmi 1500 kubmetrdən 1700 kubmetrə, aylıq elektrik enerjisinin istehlakının həcmi isə 250 kilovat-saatdan 300 kilovat-saata qaldırılıb. Rəsmi məlumatda deyilir ki, bununla ödənişlərində artım olmayan əhali abonentlərinin sayı təbii qaz üzrə 62 faizdən 75 faizədək, elektrik enerjisi üzrə isə 72 faizdən 80 faizədək yüksəlir.
