Cəbhə bölgəsində yeni hərbi şəhərcik
Müdafiə Nazirliyinin mətbuat xidməti xəbər verir ki, prezident, Silahlı Qüvvələrin ali baş komandanı İlham Əliyevin göstərişinə əsasən cəbhə bölgəsində yeni tikilən növbəti hərbi kompleksin açılışı olub.
Müdafiə Nazirliyinin rəhbərliyi hərbi şəhərciyin ərazisindəki qərargah, döyüş texnikası saxlancları, əsgər yataqxanaları, yeməkxana, qazanxana-camaşırxana kompleksi, ərzaq anbarı, tibb məntəqəsi, sıra meydanı və digər obyektlərlə tanış olub.
Müdafiə naziri general-polkovnik Zakir Həsənov şəxsi heyət qarşısında çıxış edərək ordu quruculuğunda əldə edilən uğurlardan danışıb, döyüş və mənəvi-psixoloji hazırlığın daha da artırılması, sosial-məişət şəraitinin yaxşılaşdırılması və maddi-texniki bazanın möhkəmləndirilməsi məqsədilə görülən işləri diqqətə çatdırıb.
Daha sonra nazirliyin rəhbərliyi hərbi qulluqçularla birlikdə nahar edib.
