Gəncədə forum: 43 sahibkara güzəştli kredit verildi
İqtisadiyyat Nazirliyinin Sahibkarlığa Kömək Milli Fondu dekabrın 22-si Gəncədə işgüzar forum keçirib. 150-yə yaxın sahibkarın iştirak etdiyi forumda Gəncədə və ətraf rayonlarda fəaliyyət göstərən 43 sahibkara 7,3 milyon manat güzəştli kredit verilib. Rəsmi məlumata görə, kreditlər əsasən aqropark kompleksinin yaradılması, heyvandarlıq, un məmulatları, mərmər, şüşə, plastik qapı-pəncərə istehsalı, tərəvəzçilik, turizm sahələrinin inkişafına yönəldiləcək və 250-yə yaxın yeni iş yerinin açılmasına imkan yaradacaq.
Forumda çıxış edən Sahibkarlığa Kömək Milli Fondunun icraçı direktorunun müavini Arif Vəliməmmədov bildirib ki, indiyədək fondun vəsaitləri hesabına Gəncə şəhərində sahibkarlıq subyektlərinin 481 investisiya layihəsinin maliyyələşdirilməsinə 39 milyon manat güzəştli kredit ayrılıb. Qeyd edilib ki, ümumilikdə Gəncə-Qazax iqtisadi rayonunda fəaliyyət göstərən 6000-dən çox sahibkarlıq subyekti 228 milyon manat güzəştli kredit alıb.
