Azərbaycan rus jurnalistin fotolarında
Rusiyalı jurnalist Svetlana Sannikova Azərbaycanda çəkdiyi fotoları bloqunda yerləşdirib. AZƏRTAC-ın məlumatına görə, Sannikova ölkənin bir neçə bölgəsində olub və bu barədə təəssüratlarını sosial şəbəkələrdə paylaşıb: “Azərbaycana səyahət barədə heç vaxt düşünməmişdim. Bu vaxtadək Bakının adı çəkiləndə təsəvvürümdə neft canlanırdı. İşimlə əlaqədar Azərbaycana gəldim. Həmkarlarımla Bakı, Gəncə, Şəki, Tovuz və Xaçmaza səfər etmək imkanımız oldu. Bu ölkə haqqında təsəvvürlərim tamamilə dəyişdi.
Mən foto həvəskarı olduğum üçün hara getsəm, özümlə fotoaparat götürürəm. Azərbaycana gələrkən də belə oldu. Düzdür, foto çəkməyə elə də çox vaxt ayıra bilmirəm. Bu səbəbdən albomuma yerləşdirdiyim şəkillərin xeyli hissəsini demək olar ki, yol gedərkən, avtomobilin pəncərəsindən çəkmişəm”.
