Qarabağdan da söhbət gedib
Dekabrın 21-də Yerevana rəsmi səfər edən İran prezidenti Həsən Ruhaninin Ermənistan prezidenti Serj Sərkisyanla görüşündə Dağlıq Qarabağ münaqişəsindən də söhbət gedib. Novator.az-ın məlumatına görə, danışıqlardan sonra keçirilən birgə brifinqdə Həsən Ruhani deyib ki, Ermənistanla Azərbaycan İrana dost dövlətlərdir və Tehran bölgədə sabit sülhün bərqərar olmasını istəyir: “Qarabağ məsələsinin hərbi həlli yoxdur”.
Ermənistan prezidenti İranın Qarabağ münaqişəsində balanslı mövqeyini yüksək qiymətləndirdiyini vurğulayıb: “Qarabağ münaqişəsinin hərbi yolla həlli mümkün deyil və regionda gərginliyə səbəb ola biləcək addımlar atılması yolverilməzdir”.
1988-ci ildən başlayaraq Ermənistanın Azərbaycana hərbi təcavüzü nəticəsində Dağlıq Qarabağ bölgəsi (Ağdərə, Xocavənd, Xankəndi, Xocalı, Şuşa) və daha 7 rayon (Laçın, Kəlbəcər, Zəngilan, Qubadlı, Cəbrayıl, Ağdam, Füzuli) zəbt edilib. 1994-cü ilin mayında elan olunan atəşkəsdən bəri ATƏT-in Minsk qrupunun vasitəçiliyi ilə aparılan sülh danışıqları heç bir nəticə vermir.
