Müəllim imtahanı: daha bir mərhələ arxada qaldı
Dövlət ümumi təhsil müəssisələrində çalışan müəllimlərin bilik və bacarıqlarının diaqnostik qiymətləndirilməsi başa çatıb. Təhsil Nazirliyi bildirir ki, dekabrın 20-də Lənkəran, Astara, Lerik və Yardımlı rayonlarının dövlət ümumi təhsil müəssisələrində çalışan müəllimlərin bilik və bacarıqlarının diaqnostik qiymətləndirilməsi bitib, bununla noyabrın 15-dən start verilən proses başa çatıb.
Cənub bölgəsində üç gün davam edən imtahanlarda 7500 nəfərdən çox müəllim iştirak edib.
Ümumilikdə ölkənin 26 şəhər və rayonunun dövlət ümumi təhsil müəssisələrində çalışan müəllimlərin bilik və bacarıqlarının diaqnostik qiymətləndirilməsində 36 min nəfər iştirak edib.
Şuşa rayonunun Bakıda fəaliyyət göstərən ümumtəhsil müəssisələrinin, həmçinin, Sabirabad, Şirvan, Hacıqabul, Abşeron, Qubadlı rayonlarının və Bakı, Sumqayıt şəhərlərinin əvvəlki illərdə imtahanda iştirak etməyən müəllimləri üçün dekabrın 25-dən sonra qiymətləndirmə keçiriləcək.
Ötən 2 il ərzində Bakı şəhərində və ölkənin 12 bölgəsində dövlət ümumi təhsil müəssisələrində çalışan 60 min nəfərə yaxın müəllimin diaqnostik qiymətləndirilməsi keçirilib və onların həftəlik dərs yükü norması 1,5 dəfə, aylıq vəzifə maaşı isə 2 dəfə artırılıb. Bütün diaqnostik qiymətləndirmələrdən sonra maaşı artırılan müəllimlərin sayının 100 minə çatacağı nəzərdə tutulur.
