Kütləvi zəhərlənmədə ölənlərin sayı 52-yə çatıb
Rusiyanın İrkutsk şəhərində yemişan məhlulundan zəhərlənib ölənlərin sayı 52-yə çatıb. Novator.az-ın məlumatına görə, İrkutsk vilayətinin səhiyyə naziri Oleq Yaroşenko dekabrın 20-də belə açıqlama verib.
Oleq Yaroşenko xəstəxanalardakı 28 nəfərdən 13-nün vəziyyətinin çox ağır olduğunu bildirib. Nazir həmin 13 nəfərin yaşamasına ümid olmadığını qeyd edib.
Həkimlərin sözlərinə görə, zəhərlənənlərin çoxu koma vəziyyətindədir. Mütəxəssislər vanna qəbulu üçün nəzərdə tutulan yemişan suyunun tərkibində metanol aşkarlayıb.
Yemişan məhlulundan zəhərlənənlərin 99 faizi Novo-Lenino mikrorayonunun sakinləridir. Novo-Leninoda yemişan suyu və spirt tərkibli başqa məhsullar hazırlayan qeyri-leqal sex aşkara çıxıb.
Saxta yola hazırlanmış məhluldan kütləvi zəhərlənmə dekabrın 18-də baş verib.
Bölgədə matəm elan olunub.
