Azexport.az portalı təqdim olunub
Dekabrın 20-də “ADA” Universitetində İqtisadi İslahatların Təhlili və Kommunikasiya Mərkəzinin yaratdığı Azexport.az portalının təqdimatı olub. AZƏRTAC-ın məlumatına görə, mərkəzin icraçı direktoru Vüsal Qasımlı portalın missiyasının Azərbaycan mənşəli mallar haqqında məlumatların təqdim edilməsi, onların daxili və xarici bazarlarda satışı üçün əlverişli platforma yaradılması olduğunu bildirib.
Qeyd edilib ki, dünyanın və Azərbaycanın aparıcı nəqliyyat-logistika şirkətləri və ödəmə sistemləri Azərbaycan mallarının realizasiyası üçün bu platformaya inteqrasiya olunublar.
Təqdimatda çıxış edən Milli Məclisin iqtisadi siyasət, sənaye və sahibkarlıq komitəsinin sədri Ziyad Səmədzadə deyib ki, bu ilin əvvəlindən reallaşan islahatların əsas prioritetlərindən biri məhz ixracın genişləndirilməsi, Azərbaycan brendi ilə qeyri-neft məhsullarının istehsalı və xarici ölkələrə satılmasının təşviqidir.
Azərbaycanda Amerika Ticarət Palatasının prezidenti İlqar Vəliyev bildirib ki, Azexport.az platforması ilə sahibkarlar öz məhsullarını xarici ölkələrdə seçdiyi bazarlara daha rahat şəkildə çıxara biləcək, əvvəlki dövrlərdən fərqli olaraq öz məhsullarını tanıtmaq üçün bir çox əlavə xərclərdən də azad olacaqlar.
Sayt prezidentin “Azərbaycan Respublikasında istehsal olunan malların vahid məlumat bazasının yaradılması haqqında” 21 sentyabr 2016-cı il sərəncamı əsasında yaradılıb.
