ABŞ-da seçkinin nəticəsi: kollegiya yekun qərarını verdi
ABŞ-ın Seçicilər Kollegiyası dekabrın 19-da prezident seçkisi ilə bağlı yekun qərarını verib.
Novator.az-ın məlumatına görə, kollegiyada keçirilmiş səsvermədə 304 nəfər Respublikaçılar Partiyasının namizədi Donald Trampı, 227 nəfər Demokratlar Partiyasının namizədi Hillari Klintonu dəstəkləyib.
Noyabrın 8-də keçirilmiş seçkidə Donald Tramp Seçicilər Kollegiyasına 306, Hillari Klinton isə 232 nümayəndə qazanmışdı.
Seçicilər Kollegiyasında keçirilən səsvermə göstərir ki, Donald Trampa səs vermək öhdəliyi götürmüş 2 nəfər, Hillari Klintona səs vermək öhdəliyi götürmüş 5 nəfər fikrini dəyişib. Onlar partiyalarından prezidentliyə iddia etmiş başqa şəxslərə səs veriblər. Bu, 1836-cı ildən sonra ilk belə hadisədir. Həmin il Seçicilər Kollegiyasının 23 üzvü öhdəliyi pozmuşdu.
8 noyabr seçkisində öhdəliyini pozmuş kollegiya üzvlərinin 4-ü Vaşinqton ştatını, 2-si Texası, 1-i Havay adalarını təmsil edir.
Seçicilər Kollegiyasındakı səsvermənin nəticəsi Konqresin gələn il yanvarın 6-da keçiriləcək iclasında rəsmən bəyan olunacaq.
Seçicilər Kollegiyası ştatların ümumxalq səsverməsində müəyyənləşdirdiyi xüsusi nümayəndələrdən ibarətdir. Hər ştatın ABŞ Konqresində təmsilçilərinin sayı qədər nümayəndə seçmək hüququ var. 8 noyabr seçkisində Donald Tramp daha çox ştatda qalib olduğu üçün Seçicilər Kollegiyasına Hillari Klintondan çox nümayəndə göndərib. Ölkə üzrə isə Hillari Klinton Donald Trampdan 2 milyondan çox səs toplayıb.
Donald Tramp 1946-cı ildə Nyu-York ştatında doğulub. 1968-ci ildə Pensilvaniya Universitetinin Uorton Biznes Məktəbini bitirib. Bütün karyerasını tikinti biznesinə həsr edib, milyarderdir.
1999-cu ildən Respublikaçılar Partiyasının üzvü olan Donald Tramp bu il iyul ayında qurumun prezidentliyə namizədi seçilib.
