İtkin neftçilər: axtarış zonası genişləndirilir
“Azneft”in Nəriman Nərimanov adına Neft-Qaz Çıxarma İdarəsinə aid estakadanın bir hissəsinin dənizə uçması nəticəsində itkin düşmüş neftçilərin axtarışı davam etdirilir.
Qəza dekabrın 15-də güclü külək üzündən baş verib. Həmin gün neftçi Qafarov İlham Əlihüseyn oğlunun meyiti tapılıb. Digər 9 neftçinin axtarışları hələ nəticəsizdir.
Dövlət Dəniz Administrasiyasının Gəmilərin Hərəkətinin İdarəolunması Milli Mərkəzində yaradılan qərargah dekabrın 19-da yeni məlumat yayıb. Qeyd olunur ki, Müdafiə Nazirliyi, Fövqəladə Hallar Nazirliyi, Dövlət Sərhəd Xidməti, SOCAR və Azərbaycan Xəzər Dəniz Gəmiçiliyinə məxsus ümumilikdə 44 gəmi və üzən vasitənin, 6 vertolyotun, 700-dən artıq canlı qüvvənin cəlb olunduğu xilasetmə əməliyyatları uzunluğu 100 kilometr, eni 72 kilometr olan geniş ərazini əhatə edir.
Hazırda hadisənin baş verdiyi rayonda hava şəraiti, küləyin, sualtı və suüstü axıntıların istiqaməti və sürəti təhlil olunaraq axtarış-xilasetmə zonasının daha da genişləndirilməsi barədə qərar qəbul edilib. Bununla əlaqədar olaraq xarici bayraq altında üzən gəmilər də daxil olmaqla ərazidəki bütün gəmilərlə və Xəzəryanı dövlətlərin gəmilərin hərəkətinin idarə olunması qurumları ilə mütəmadi məlumat mübadiləsi aparılır.
