Prezident Xəzərdə baş vermiş hadisə ilə əlaqədar sərəncam imzaladı
Dekabrın 16-da prezident İlham Əliyev Dövlət Neft Şirkətinin “Azneft” İstehsalat Birliyinin neft yığım məntəqəsində baş vermiş hadisə ilə əlaqədar sərəncam imzalayıb.
Xatırladaq ki, hadisə dekabrın 15-də Xəzər dənizində baş verib. “Azneft”in Nəriman Nərimanov adına Neft-Qaz Çıxarma İdarəsinin 3 saylı neft yığım məntəqəsində estakadanın bir hissəsinin uçması nəticəsində 10 nəfər dənizə düşüb. Onlardan birinin meyiti tapılıb, 9 nəfərin axtarışı davam etdirilir.
Novator.az-ın məlumatına görə, prezident İlham Əliyevin 16 dekabr sərəncamında Fövqəladə Hallar Nazirliyinə, Dövlət Neft Şirkətinə və “Azərbaycan Xəzər Dəniz Gəmiçiliyi” QSC-yə baş vermiş hadisə zamanı itkin düşənlərin axtarışını və xilasetmə işlərini sürətləndirmək, Nazirlər Kabinetinə isə hadisə nəticəsində zərər çəkmiş şəxslərə və həlak olanların ailə üzvlərinə maddi və digər zəruri yardım göstərilməsini təmin etmək tapşırılır.
Sərəncama əsasən, Dövlət Neft Şirkəti “Azneft”in Nəriman Nərimanov adına Neft-Qaz Çıxarma İdarəsinin 3 saylı neft yığım məntəqəsinə dəymiş zərəri və məntəqənin yararlılıq vəziyyətini müəyyənləşdirməli, hadisənin nəticələrinin aradan qaldırılması üçün təxirəsalınmaz tədbirlər həyata keçirməli, şirkətin tabeliyində olan müəssisələrdə obyektlərin və qurğuların texniki təhlükəsizlik norma və qaydalarının tələblərinə uyğun istismar edilməsi və onların təhlükəsiz istismarı müddətlərinə riayət olunması vəziyyətini araşdırmalı və aşkar edilmiş nöqsanları aradan qaldırmalıdır.
Sərəncamda Baş Prokurorluğa tövsiyə edilir ki, baş vermiş hadisənin səbəblərinin araşdırılması üçün təxirəsalınmaz tədbirlər həyata keçirsin.
Xəzərdə estakada uçub, 10 nəfər itkin düşüb
Xəzərdə faciə: “Azneft”də qərargah yaradılıb
Xəzərdə daha bir fövqəladə hadisə: Səngəçal estakadasında qüllə aşıb
