Parlament büdcə zərfini qəbul etdi
Dekabrın 16-da Milli Məclis 2017-ci ilin büdcə zərfini qəbul edib. Zərfə 2017-ci ilin dövlət büdcəsi, Dövlət Sosial Müdafiə Fondunun büdcəsi, 2017-ci il üçün yaşayış minimumu, ehtiyac meyarı, Milli Məclisin və Hesablama Palatasının 2017-ci il üçün xərclər smetaları daxildir.
Plenar iclasda çıxış edən maliyyə naziri Samir Şərifov deyib ki, deputatların təklifləri nəzərə alınaraq mədəniyyət sahəsinə əlavə 3 milyon manat vəsait ayrılıb. Parlamentə təqdim olunmuş layihədə 2017-ci ilin dövlət büdcəsinin gəlirləri 16 milyard 255 milyon manat, xərcləri 16 milyard 900 milyon manat nəzərdə tutulurdu. Milli Məclisin saxlanma xərcləri isə 850 min manat artırılıb. Xəbəri Report.az yayıb.
Dövlət Sosial Müdafiə Fondunun 2017-ci il büdcəsi 3,4 milyard manat təsdiqlənib.
2017-ci il yanvarın 1-dən yaşayış minimumu ölkə üzrə 155 manat, əmək qabiliyyətli əhali üçün 164,5 manat, pensiyaçılar üçün 130,2 manat, uşaqlar üçün 136,6 manat müəyyən ediləcək.
Ehtiyac meyarının həddi 105 manatdan 116 manata qaldırılıb. Bu, ünvanlı sosial yardımın təyin edilməsi üçün müəyyənləşən rəqəmdir.
Gələn il Hesablama Palatasının saxlanması üçün 3 milyon 812,8 min manat vəsait ayrılacaq.
