Azərbaycanın axtardığı bloqçu Belarusda tutulub
Azərbaycanın beynəlxalq axtarışa verdiyi Aleksandr Lapşin Belarusda tutulub.
Novator.az bildirir ki, Aleksandr Lapşin bloqçudur. O, 1976-cı ildə Rusiyanın Yekaterinburq şəhərində doğulub. Atası rus, anası yəhudidir. 13 yaşından İsraildə yaşayıb, orada ali təhsil alıb, bir müddət ABŞ-da oxuyub. 2003-2008-ci illərdə Moskvada yaşayan bloqçu sonradan İsrailə qayıdıb.
Dekabrın 16-da Baş Prokurorluğun mətbuat xidməti bəyan edib ki, ayrı-ayrı dövlətlərin vətəndaşlığını daşıyan Lapşin 2011-ci ilin aprel və 2012-ci ilin oktyabr aylarında Azərbaycanın işğal olunmuş ərazilərinə səfər edib. O, qanunsuz rejimin beynəlxalq səviyyədə təbliğ edilməsi məqsədilə özünə məxsus Puerrtto.livejournal.com portalında Dağlıq Qarabağı müstəqil dövlət kimi qələmə verib, həmçinin 6 aprel və 29 iyun 2016-cı il müraciətlərində işğal olunmuş ərazilərdə qanunsuz fəaliyyət göstərən rejimin “müstəqilliyini” dəstəkləməklə Azərbaycan Respublikasının beynəlxalq səviyyədə tanınmış ərazi bütövlüyünün parçalanmasına yönələn açıq çağırışlar edib.
Baş Prokurorluğun Ağır Cinayətlərə Dair İşlər üzrə İstintaq İdarəsində fakta görə Cinayət Məcəlləsinin 281.2-ci (dövlət əleyhinə yönələn açıq çağırışlar) və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi başlanıb və Lapşin dövlətlərarası axtarışa verilib.
Dekabrın 16-na olan rəsmi məlumata görə, Belarusun hüquq mühafizə orqanlarının həyata keçirdikləri tədbirlər nəticəsində Lapşin saxlanıb. Hazırda onun Azərbaycan Respublikasına ekstradisiya olunması ilə əlaqədar zəruri tədbirlər görülür.
