41 sahibkara güzəştli kredit verilib
Dekabrın 16-da İqtisadiyyat Nazirliyinin Sahibkarlığa Kömək Milli Fondu Salyan rayonunda işgüzar forum keçirib. Forumda Salyan və ətraf rayonlardan olan 41 sahibkara 5,4 milyon manat güzəştli kredit verilib. Kreditlər əsasən istixana kompleksinin inşası, quşçuluq, tərəvəzçilik, əkinçilik, heyvandarlıq, plastik qapı-pəncərə istehsalı sahələrinin inkişafına yönəldiləcək. Layihələrin reallaşdırılması hesabına 200-ə yaxın yeni iş yerinin açılması mümkün olacaq.
AZƏRTAC xəbər verir ki, 100-dən çox sahibkarın qatıldığı forumda çıxış edən Sahibkarlığa Kömək Milli Fondunun icraçı direktoru Şirzad Abdullayev deyib ki, indiyədək Salyan rayonundan olan 380-dən çox sahibkarın investisiya layihəsinin maliyyələşdirilməsinə 40,6 milyon manat güzəştli kredit ayrılıb. Ümumilikdə indiyədək Aran iqtisadi rayonunda fəaliyyət göstərən 12800-dən çox sahibkar 503 milyon manatdan çox güzəştli kredit alıb. Bu kreditlər 39400-dən çox yeni iş yerinin açılmasına imkan yaradır.
