2017-ci ildə 241 iş günü var
Əmək və Əhalinin Sosial Müdafiəsi Nazirliyi 2017-ci ilin istehsalat təqvimini təsdiq edib. Bildirilir ki, 2017-ci ildə beşgünlük iş həftəsində 241 iş günü, iş günü hesab edilməyən 110 istirahət günü, iş günü hesab edilməyən 17 bayram və 1 Ümumxalq Hüzn Günü var.
2017-ci il üçün 40 saatlıq iş həftəsində iş vaxtının illik norması 1922 saat olacaq. Altıgünlük iş həftəsi olan iş yerlərində 40 saatlıq iş həftəsində çalışan işçilər üçün 2017-ci ildə beşgünlük iş həftəsi üzrə hesablanmış 1922 saatlıq illik iş vaxtı norması tətbiq edilməlidir.
2017-ci ildə 1, 2 yanvar Yeni il bayramı, 20 yanvar Ümumxalq Hüzn Günü, 8 mart Qadınlar Günü, 20, 21, 22, 23, 24 mart Novruz bayramı, 9 may Faşizm Üzərində Qələbə Günü, 28 may Respublika Günü, 15 iyun Azərbaycan Xalqının Milli Qurtuluş Günü, 26 iyun Azərbaycan Respublikasının Silahlı Qüvvələri Günü, 26, 27 iyun Ramazan bayramı, 1, 2 sentyabr Qurban bayramı, 9 noyabr Azərbaycan Respublikasının Dövlət Bayrağı Günü və 31 dekabr Dünya Azərbaycanlılarının Həmrəyliyi Günü iş günü hesab edilmir.
2017-ci ildə istirahət günlərinin iş günləri hesab olunmayan bayram günləri və Ramazan bayramının bir gününün Azərbaycan Respublikasının Silahlı Qüvvələri Günü ilə üst-üstə düşməsi ilə əlaqədar olaraq beşgünlük iş həftəsində 3, 4 yanvar, 29 may, 28 iyun və 4 sentyabr, altıgünlük iş həftəsində isə 3 yanvar və 29 may istirahət günləridir.
