Yeni sosial-iqtisadi göstəricilər
2016-cı ildə əhalinin sayı 88,2 min nəfər və ya 0,9 faiz artaraq noyabr ayının 1-nə 9 milyon 793,8 min nəfərə çatıb. Novator.az-ın məlumatına görə, Dövlət Statistika Komitəsi bildirir ki, yanvar-noyabr aylarında əvvəlki ilin müvafiq dövrü ilə müqayisədə əhalinin gəlirləri nominal ifadədə 8,9 faiz artaraq 40 milyard 28,5 milyon manat olub.
11 ayda dövlət büdcəsinə 12 milyard 965,5 milyon manat vəsait daxil olub, büdcədən 13 milyard 927,4 milyon manat vəsait xərclənib, büdcənin icrasında 961,9 milyon manatlıq kəsir yaranıb.
Noyabr ayının 1-nə ölkənin bank və bank olmayan kredit təşkilatlarının kredit portfeli milli valyuta ekvivalentində 15 milyard 820 milyon manat təşkil edib. Kredit portfeli 2015-ci il noyabr ayının 1-i ilə müqayisədə 14,8 faiz azalıb. Ödəmə vaxtı keçmiş kreditlərin məbləği ümumi kredit portfelinin 8,7 faizinə bərabər olub. Əhalinin banklardakı əmanətlərinin milli valyuta ekvivalentində məbləği 2016-cı il noyabr ayının 1-nə 7 milyard 413,1 milyon manat təşkil edib.
Noyabr ayında milli valyutanın 1 ABŞ dollarına nisbətdə orta məzənnəsi 1,69 manat olub.
