Şövkət Mirziyayev prezidentliyə başladı
Özbəkistanın yeni seçilmiş prezidenti Şövkət Mirziyayev dekabrın 14-də and içərək səlahiyyətlərinin icrasına başlayıb. Novator.az-ın məlumatına görə, parlamentin aşağı və yuxarı palatalarının birgə iclasında 4 dekabr seçkisində Şövkət Mirziyayevin səslərin 88,61 faizini toplayaraq dövlət başçısı seçildiyi bəyan olunub və ona prezident vəsiqəsi təqdim edilib.
Özbəkistana 1989-cu ildən rəhbərlik edən prezident İslam Kərimov 2016-cı il sentyabrın 2-də dünyasını dəyişib. Sentyabrın 8-də baş nazir Şövkət Mirziyayev dövlət başçısı səlahiyyətlərinə yiyələnib.
Özbəkistanda dekabrın 4-də keçirilmiş növbədənkənar prezident seçkisində Liberal Demokrat Partiyasının namizədi olmuş Şövkət Mirziyayevin 59 yaşı var. O, 1981-ci ildə Daşkənd İrriqasiya və Meliorasiya İnstitutunu bitirib. 1992-ci ilədək həmin institutda elmi işçi, komsomol təşkilatının katibi, partiya təşkilatının rəhbəri, 1-ci prorektor vəzifələrində çalışıb. Texnika elmləri namizədidir.
1990-cı ildə Özbəkistan Ali Sovetinin, 1994 və 1999-cu illərdə Ali Məclisin deputatı seçilib. Daşkəndin Mirzə-Uluqbəy rayonunun, Cizak vilayətinin, Səmərqənd vilayətinin icra hakimi olub. 2003-cı il dekabrın 12-dən baş nazir idi.
