Sənayedə enmə, kənd təsərrüfatında artım
Sənaye müəssisələri və bu sahədə fəaliyyət göstərən fərdi sahibkarlar 2016-cı ilin yanvar-noyabr aylarında 28,8 milyard manatlıq və ya əvvəlki ilin müvafiq dövrü ilə müqayisədə 0,6 faiz az sənaye məhsulu istehsal edib. Novator.az-ın məlumatına görə, Dövlət Statistika Komitəsi belə hesabat yayıb. Qeyd olunur ki, sənayenin qeyri-neft sektorunda məhsul istehsalı 4,9 faiz artıb, neft sektorunda isə 1,3 faiz azalıb.
Kənd təsərrüfatının ümumi məhsulu isə 2015-ci ilin yanvar-noyabr ayları ilə müqayisədə 2,3 faiz, o cümlədən heyvandarlıq məhsulları istehsalı 2,5 faiz, bitkiçilik məhsulları istehsalı isə 2,1 faiz artıb.
Nəqliyyat sektoruna gəlincə, 2016-cı ilin yanvar-noyabr aylarında yük daşınmasında 2015-ci ilin müvafiq dövrü ilə müqayisədə 0,5 faiz azalma, sərnişin daşınmasında isə 2 faiz artım olub.
2015-ci ilin müvafiq dövrü ilə müqayisədə 2016-cı ilin yanvar-noyabr aylarında informasiya və rabitə xidmətlərinin dəyəri 4,4 faiz artıb.
