Ermənistanda hərbi təzminat fondu vergilərdən və rüsumlardan azad oldu
Dekabrın 14-də Ermənistan parlamenti döyüş şəraitində həlak olmuş və yaralanmış hərbi qulluqçulara təzminat fondu yaradılması barədə qanunla bağlı yeni akt qəbul edib. Novator.az-ın məlumatına görə, təzminat fondu vergilərdən və rüsumlardan azad olunub.
Qanuna əsasən, işləyən şəxslərin maaşından fonda ayda 1000 dram (2 dollara yaxın) tutulacaq.
Fonddan döyüş şəraitində ölən və I qrup əlil olan hərbi qulluqçu üçün 10 milyon dram (20 min dollara yaxın), II qrup əlil olan hərbi qulluqçu uçun 5 milyon dram (10 min dollara yaxın) birdəfəlik təzminat ayrılacaq.
I qrup əlillər üçün 20 il ərzində sığorta ödənişi nəzərdə tutulur. Zabitlər ayda 300 min dram (600 dollar), gizirlər 250 min dram (500 dollar), sıravi heyət 200 min dram (400 dollar) alacaq.
II qrup əlillər üçün də aylıq sığorta ödənişi planlaşdırılır: zabitlərə 200 min dram, gizirlərə 150 min dram (300 dollar), sıravi heyətə 100 min dram (200 dollar) veriləcək.
Qaydalar 2017-ci il yanvarın 28-dən tətbiq olunacaq.
