Yeni hərrac büdcəyə 4,3 milyon manat gətirir
Dekabrın 13-də Əmlak Məsələləri Dövlət Komitəsi növbəti hərrac keçirib. Rəsmi məlumata görə, hərracda ümumilikdə 26 dövlət əmlakı (7 kiçik dövlət müəssisə və obyekti, 7 istifadəsiz qeyri-yaşayış sahəsi və 11 nəqliyyat vasitəsi, 1 yarımçıq tikili) özəlləşdirilib. Dövlət büdcəsinə köçürüləcək məbləğ 4,3 milyon manat təşkil edib.
Özəlləşdirilən kiçik dövlət müəssisələrinin 1-i Bakıda, 3-ü Gəncədə, 2-si Şəkidə, 1-i Zaqatalada, qeyri-yaşayış sahələrinin 2-si paytaxtda, 2-si Sumqayıtda, 2-si Göyçayda, 1-i Ağdaşda, yarımçıq tikili isə Füzulidə yerləşir.
Komitə növbəti hərracı dekabrın 20-də keçirəcək. Həmin gün hərraca çıxarılan 84 əmlakdan 23-ü səhmdar cəmiyyəti, 26-sı kiçik dövlət müəssisə və obyekti, 32-si istifadəsiz qeyri-yaşayış sahəsi, 3-ü nəqliyyat vasitəsidir.
