Ticarət hesabatı açıqlanıb
Dövlət Statistika Komitəsi yanvar-oktyabr ayları üzrə xarici ticarət hesabatı yayıb. Novator.az-ın məlumatına görə, hesabatda bildirilir ki, 10 ay ərzində 174 ölkə ilə ticarət əməliyyatları həyata keçirilib, 105 ölkəyə məhsul ixrac olunub, 169 ölkədən mal idxal edilib.
Yanvar-oktyabr aylarında xarici ticarət dövriyyəsi 17 milyard 806,4 milyon ABŞ dolları olub. İxracın dəyəri 10 milyard 848,4 milyon dollar, idxalın dəyəri 6 milyard 958 milyon dollar təşkil edib, 3 milyard 890,4 milyon dollarlıq müsbət ticarət saldosu yaranıb.
Ticarət dövriyyəsinin 37,6 faizi Avropa İttifaqı, 12,1 faizi MDB ölkələri, 50,3 faizi isə dünyanın digər ölkələrinin payına düşüb.
Başqa bir hesabata əsasən, yanvar-noyabr aylarında istehlakçılara 26,3 milyard manatlıq və ya 2015-ci ilin eyni dövrü ilə müqayisədə 1,7 faiz çox məhsul satılıb. Ərzaq məhsulları, içkilər və tütün məmulatları üzrə satışın dəyərində real ifadədə 2,6 faiz, qeyri-ərzaq məhsulları üzrə isə 0,7 faiz artım var.
Hesabat dövründə istehlakçıların pərakəndə ticarət şəbəkələrində xərclədiyi vəsaitin 49,7 faizi ərzaq məhsulları, içkilər və tütün məmulatlarının, 18 faizi toxuculuq məhsulları, geyim və ayaqqabıların, 6,6 faizi elektrik malları və mebelin, 5,7 faizi avtomobil yanacağının, 1,5 faizi əczaçılıq və tibbi malların, 0,8 faizi kompüterlər, telekommunikasiya avadanlıqları və çap məhsullarının, 17,7 faizi isə digər qeyri-ərzaq məhsullarının alınmasına sərf olunub.
