Romni posta getmir, xeyir-dua verir
Respublikaçılar Partiyasının üzvü Mitt Romni ABŞ-ın dövlət katibi postuna namizədlər siyahısından çıxıb. Novator.az-ın məlumatına görə, bunu Mitt Romni özü bəyan edib. O, “Facebook” səhifəsində yazıb ki, adının ABŞ-ın dövlət katibi postuna namizədlər siyahısında çəkilməsi böyük şərəfdir: “Mənim ABŞ-ın yeni seçilmiş prezidenti Donald Trampla söhbətlərim xoş və faydalı idi. İnanıram ki, yeni administrasiya ölkəmizi daha da güclü edəcək, çiçəkləndirəcək”.
Mitt Romni 1947-ci ildə Detroyt şəhərində anadan olub. Dini təmayüllü Brihem Yanq Universitetini (humanitar elmlər bakalavrı dərəcəsi ilə) və Harvard Universitetini (hüquq doktoru və işgüzar idarəçilik magistri dərəcələri ilə) bitirib.
Uzun illər “Bain Capital” investisiya şirkətinə rəhbərlik edən Mitt Romni siyasətə 1994-cü ildə qatılıb. 2003-2007-ci illərdə Massaçusets ştatının qubernatoru vəzifəsində çalışıb.
2012-ci ilin prezident seçkisində Respublikaçılar Partiyasının namizədi olan Mitt Romni demokrat Barak Obamaya uduzub.
Noyabrın 8-də keçirilmiş prezident seçkisində Respublikaçılar Partiyasının namizədi Donald Tramp Seçicilər Kollegiyasına 306 nümayəndə qazanıb. Onun əsas rəqibi, Demokratlar Partiyasından Hillari Klinton 232 nümayəndə ilə kifayətlənib. Yeni prezidentin andiçmə mərasimi gələn il yanvarın 20-də olacaq.
