İtaliyada yeni hökumət
İtaliyada yeni hökumət qurulub. Novator.az xəbər verir ki, baş nazir postuna 62 yaşlı Paolo Centiloni gətirilib. O, əvvəlki hökumətdə xarici işlər naziri idi.
Demokrat Partiyasının üzvü olan Paolo Centiloni dekabrın 12-də hökumət üzvlərinin siyahısını açıqlayıb. Əvvəlki hökumətin əksər naziri kürsüsünü qoruyub. Xarici işlər nazir postuna əvvəlki daxili işlər naziri Ancelino Alfano təyin edilib. Daxili işlər nazir kürsüsünə isə əvvəlki hökumətdə xüsusi xidmət orqanlarına kuratorluq edən Marko Minniti gətirilib.
18 nazirdən ibarət hökumət dekabrın 12-si ölkə prezidentinin qarşısında and içib. Bu gün isə hökumət parlamentin aşağı və yuxarı palatalarında təsdiqlənməlidir.
Əvvəlki baş nazir Matteo Renzi 4 dekabr referendumunda məğlubiyyətə görə istefa verib. Matteo Renzi hökuməti referendumda konstitusiyanın Senatla bağlı müddəalarını dəyişdirmək istəyirdi. Təşəbbüsə əsasən, Senat üzvlərinin sayı 315-dən 100-ə düşürülməli, senatorlar ümumxalq seçkisində deyil, bölgə məclislərində seçilməli və təyin olunmalı idi. Layihədə 95 senatorun bölgə məclislərində seçilməsi, 5 senatoru prezidentin təyin etməsi, yerli və mərkəzi hakimiyyət orqanları arasında səlahiyyətlərin yenidən bölüşdürülməsi nəzərdə tutulurdu. Senatın qanunların qəbulunda iştirakını minimuma endirmək, hökumətə etimadsızlıq göstərmək səlahiyyətlərinin alınması da təklif olunurdu. Seçicilərin 60 faizə yaxını konstitusiya islahatının əleyhinə səs verib.
41 yaşlı Matteo Renzi Demokrat Partiyasının lideridir. O, baş nazir postunu 2014-cü ilin fevral ayından tuturdu.
