Dünyada neçə jurnalist həbsdədir?
Bu il dünyada təhdid olunan jurnalistlərin sayı artıb. Mərkəzi qərargahı Parisdə yerləşən “Sərhədsiz reportyorlar” təşkilatının 2016-cı il üzrə illik hesabatında belə deyilir.
Novator.az-ın məlumatına görə, hesabatda bildirilir ki, hazırda dünyada 348 jurnalist həbsdədir. Bu, ötən illə müqayisədə 6% çoxdur.
Jurnalist həbslərinin ən çox artdığı ölkə Türkiyədir. Əsas səbəb iyulda bu ölkədə hərbi qiyam yatırılandan sonra aparılan kütləvi həbslərdir. Həmin həbslər nəticəsində Türkiyədə dustaq edilən jurnalistlərin sayı ötən illə müqayisədə 22% artıb. Hazırda Türkiyədə 100 nəfər jurnalistin həbsdə saxlandığı bildirilir.
Həbsdə olan jurnalistlərin sayına görə sonrakı yerlərdə Çin, İran və Misir gəlir. Dünyadakı dustaq jurnalistlərin üçdə ikisi bu ölkələrin payına düşür.
Hesabata görə, hazırda dünya üzrə 52 jurnalist girovluqda saxlanır. Onların hamısı Yaxın Şərqdə münaqişə zonalarında girov götürülüb. Girov jurnalistlərdən 21 nəfəri İŞİD terror qruplaşmasının əlindədir.
“Sərhədsiz reportyorlar”ın araşdırmasına görə, jurnalistlər üçün ən təhlükəli ölkələr Suriya və İraqdır.
Xatırladaq ki, Azərbaycanda bir çox jurnalist və bloqçu, o cümlədən Seymur Həzi, Əbdül Əbilov, Nicat Əliyev, Araz Quliyev, Rəşad Ramazanov həbsdədir.
