Torpaq müfəttişləri yeni pozuntular aşkarlayıb
Əmlak Məsələləri Dövlət Komitəsinin torpaq müfəttişləri Bakı-Şamaxı avtomobil yolunun Hökməli-Müşfiqabad hissəsində monitorinqlər keçirib. Rəsmi məlumata görə, dekabrın 8-də aparılan monitorinqdə hüquqi və fiziki şəxslərin kənd təsərrüfatı təyinatlı torpaqların məqsədli təyinatını və kateqoriyasını özbaşına dəyişdirməsi faktı aşkarlanıb, torpaqlarda qanunsuz tikinti işlərinin aparılması və əlavə torpaq sahəsinin zəbt olunması halları müəyyən edilib.
Aşkar olunmuş pozuntu halları ilə bağlı akt və protokollar tərtib olunub. Tətbiq olunmuş cərimələrin 30 gün müddətində büdcəyə ödənişinin məcburiliyi, əks halda qanuna uyğun tədbirlərin görüləcəyi bildirilib.
Komitənin indiyədək keçirdiyi belə monitorinqlər sayəsində istifadədən kənarda qalmış, eləcə də səmərəsiz istismar olunan 200 min hektara yaxın torpaq sahəsinin geri qaytarılması istiqamətində işlər aparılır.
Ümumilikdə monitorinqlər nəticəsində 1000-dən çox hal üzrə inzibati xətaya yol vermiş fiziki, hüquqi və vəzifəli şəxslər barədə inzibati protokollar tərtib edilib. 900 hal üzrə cərimələr tətbiq olunub.
