Parlament prezidentin istefasına səs verdi
Dekabrın 9-da Cənubi Koreya parlamenti prezident Pak Kın Heni istefaya göndərməyə səs verib. Novator.az-ın məlumatına görə, gizli səsvermədə qərarı 234 deputat dəstəkləyib, 56 nəfər istefanın əleyhinə çıxıb, 2 nəfər bitərəf qalıb. Bülletenlərin 7-si etibarsız sayılıb.
İmpiçment təşəbbüsünün reallaşması üçün 300 nəfərlik parlamentdə 200 deputatın səsi kifayət edir. Yekun qərarı Konstitusiya Məhkəməsi verəcək.
Pak Kın Henin istefaya göndərilməsi barədə layihəni dekabrın 8-də parlamentə Cənubi Koreya müxalifəti təqdim edib. Prezident dövlət vəzifəsi tutmayan rəfiqəsi Çoy Sun Sili hökumət işlərinə qarışdırmaqda günahlandırılır. Hazırda həbsdə olan Çoy Sun Silə və Prezident Administrasiyasının iki keçmiş əməkdaşına korrupsiya, vəzifə səlahiyyətlərindən sui-istifadə ittihamları irəli sürülüb.
Senuri Partiyasının üzvü olan Pak Kın He 2012-ci ildə prezident seçilib. O, ölkənin ilk qadın prezidentidir.
