Maqnitski qanunu dünya miqyaslı oldu
ABŞ Konqresi qlobal Maqnitski insan haqları cavabdehliyi qanununu qəbul edib. Qanun 2012-ci ildə qəbul olunmuş Maqnitski insan haqları qanununun təsir dairəsini genişləndirir.
2012-ci il qanunu yalnız Rusiya vətəndaşlarına şamil edilirdi. Həmin ilin dekabrında ABŞ Konqresi insan hüquqlarının və qanunun aliliyinin pozulmasına görə məsuliyyət daşıyan şəxslərə qarşı fərdi sanksiyalar tətbiqini nəzərdə tutan Maqnitski aktına səs verib. Qanuna əsasən, rusiyalı vəkil Sergey Maqnitskinin istintaq təcridxanasında ölümündə əli olduğu ehtimal edilən rus məmurları və hüquq mühafizə orqanı əməkdaşları qara siyahıya salınıb. Qanunda göstərilib ki, onlara ABŞ-a səfər etmək qadağan edilir, maliyyə sanksiyaları da tətbiq oluna bilər.
2016-cı il dekabrın 8-də qəbul edilmiş Maqnitski qanunu təkcə Rusiya deyil, bütün ölkələrin vətəndaşlarına tətbiq oluna bilər.
Azadliq.org-un məlumatına görə, qanun ABŞ prezidentinə insan haqlarını pozmuş və ya korrupsiyaya bulaşmış xarici rəsmilərə viza verilməsindən imtina etmək və onların ABŞ-dakı aktivlərini dondurmaq səlahiyyəti verir. Qanun kimlərə sanksiyalar qoyulması barədə qərar qəbul edərkən ABŞ prezidentini QHT-lərin rəylərini nəzərə almağa yönəldir. Bu halda prezident sanksiyalarla hədəflənmiş fərdlərin adlarını açıqlamağa borcludur.
