Güzəştli kreditlərin məbləği 157 milyon manatı keçib
Dekabrın 9-da İqtisadiyyat Nazirliyinin Sahibkarlığa Kömək Milli Fondu Şamaxıda işgüzar forum keçirib. Rəsmi məlumata görə, forumda Dağlıq Şirvan iqtisadi rayonunda fəaliyyət göstərən 30 sahibkara 262 min manat güzəştli kredit verilib. Kreditlərin əsasən heyvandarlıq, bağçılıq, arıçılıq sahələrinin inkişafına yönəldilməsi və 40-dan çox yeni iş yerinin açılması nəzərdə tutulur.
Forumda bildirilib ki, 2016-cı ilin ötən dövründə fondun vəsaitləri hesabına sahibkarlıq subyektlərinin 2400-ə yaxın investisiya layihəsinin maliyyələşdirilməsinə 157 milyon manatdan çox güzəştli kredit verilib və bununla 7700-ə yaxın yeni iş yerinin açılmasına imkan yaradıb.
Ümumilikdə indiyədək Dağlıq Şirvan iqtisadi rayonunda 1850-dən çox investisiya layihəsinə 67,7 milyon manat güzəştli kredit ayrılıb.
