Büdcə zərfi dekabrın 16-da qəbul olunacaq
Milli Məclis 2017-ci ilin büdcə zərfini dekabrın 16-da səsverməyə çıxaracaq. 2017-ci ilin dövlət büdcəsinin gəlirləri 16 milyard 255 milyon manat, xərcləri 16 milyard 900 milyon manat nəzərdə tutulur (Büdcə layihəsi). Dövlət Sosial Müdafiə Fondunun 2017-ci il üçün xərcləri 3,4 milyard manat proqnozlaşdırılır (Fondun büdcəsi).
Novator.az bildirir ki, 2017-ci il yanvarın 1-dən yaşayış minimumunu ölkə üzrə 155 manat, əmək qabiliyyətli əhali üçün 164,5 manat, pensiyaçılar üçün 130,2 manat, uşaqlar üçün 136,6 manat müəyyən etmək təklif olunur.
Ehtiyac meyarının həddini 105 manatdan 116 manata qaldırmaq planlaşdırılır. Bu, ünvanlı sosial yardımın təyin edilməsi üçün müəyyənləşən rəqəmdir.
Zərfə Milli Məclisin və Hesablama Palatasının 2017-ci il üçün xərclər smetaları da daxildir. 2017-ci il dövlət büdcəsində Milli Məclis və onun aparatının saxlanması üçün 23 milyon 89 min 714 manat vəsait nəzərdə tutulub. Bu, 2016-cı illə müqayisədə 394 min 500 manat çoxdur.
Gələn il Hesablama Palatasının saxlanması üçün 3 milyon 812,8 min manat vəsait ayrılması təklif edilir. Bu vəsait 2016-cı ildəki rəqəmi 0,8 faiz üstələyir.
