“Tik-idarə et-təhvil ver” modeli: qayda təsdiqləndi
Prezident İlham Əliyev fərman imzalayaraq tikinti və infrastruktur obyektləri ilə əlaqədar investisiya layihələrinin “Tik-idarə et-təhvil ver” modeli çərçivəsində həyata keçirilməsinin şərtləri, tikinti və infrastruktur obyektlərinin növlərinə uyğun olaraq investorlar qarşısında qoyulan tələblər, bağlanan müqavilələrin xüsusiyyətləri və şərtləri, investisiya qoyuluşu nəticəsində əldə olunacaq mal və xidmətlərin dəyərinin müəyyənləşdirilməsi qaydasını təsdiq edib.
Novator.az-ın məlumatına görə, sənəddə nəzərdə tutulan səlahiyyətli orqanın səlahiyyətlərini İqtisadiyyat Nazirliyi həyata keçirir. Qaydaya əsasən, sahə təşkilatı öz təşəbbüsü və ya səlahiyyətli orqanın müraciəti əsasında investisiya layihəsi barədə səlahiyyətli orqana təklif təqdim edir. Həmin təklif barədə səlahiyyətli orqanla sahə təşkilatı arasında müzakirələr aparılır və layihənin icrası ilə əlaqədar ilkin razılıq olduğu təqdirdə investisiya layihəsinin ilkin texniki-iqtisadi əsaslandırmasını sahə təşkilatı hazırlayaraq səlahiyyətli orqana təqdim edir. Səlahiyyətli orqan təqdim edilmiş ilkin texniki-iqtisadi əsaslandırmanı qiymətləndirir və müsbət rəy verilmiş investisiya layihəsinin həyata keçirilməsi üçün investorların cəlb edilməsi məqsədilə tədbirlər görür. İnvestisiya layihəsinə dair ətraflı texniki-iqtisadi əsaslandırma sənədini müsabiqədə iştirak edən namizəd şirkətlər, layihə-smeta sənədlərini isə qalib şirkət hazırlayır (Qayda).
