Amerika Belarusda jurnalistləri prezident seçkisinə hazırlayır
ABŞ Dövlət Departamenti Belarusda müstəqil jurnalistləri növbəti prezident seçkisinə hazırlamaq üçün 520 min dollar məbləğində maliyyə yardımı (qrant) ayırıb.
Novator.az xəbər verir ki, bu qrantla bağlı sənəd Dövlət Departamentinin Demokratiya, İnsan Hüquqları və Əmək Bürosunun saytında dərc edilib.
Sənəddə bildirilir ki, sözügedən qrant Belarusda müstəqil KİV-lərin rolunu artıran layihələrə xərclənəcək.
Namizədlərdən 2017-ci ilin yanvarın 16-na qədər layihələri təqdim etmək tələb olunur.
Politoloq, amerikaşünas Aleksandr Asafov bildirib ki, qrant vəsaitinin hansı layihələrə verilməsini ABŞ-ın Demokratiyaya Yardım Fondu (NED) həll edəcək. Asafovun sözlərinə görə, NED Belarusda müxalif KİV-ləri və ictimai təşkilatları əvvəlki prezident seçkisi ərəfəsində iki il maliyyələşdirib. Ona görə belaruslu müstəqil jurnalistlərin 2020-ci ildə keçiriləcək növbəti seçkiyə hazırlanması məsələsi də bu təşkilata tapşırılıb.
Hazırda Belarusda bir neçə müxalif media orqanı fəaliyyət göstərir. Bunların arasında “Azadlıq” və “Euroradio.FM” radiolarının, “Xartiya 97” və “Naşa Niva” internet nəşrlərinin adları daha çox çəkilir.
