İlham İsmayılın kitabı təqdim olunacaq
Qarabağ müharibəsi veteranı, polkovnik-leytenant İlham İsmayılın “KQB-MTN… Görünən dağın bələdçiliyi” kitabı çapdan çıxıb. Novator.az bildirir ki, “Qanun” Nəşrlər Evində buraxılmış kitab dekabrın 10-da oxuculara təqdim olunacaq. Tədbir saat 13-də “Akademkitab” kitab evində (Elmlər Akademiyası metrosunun yeni çıxışı, BDU-nun cərgəsi) baş tutacaq. Kitabsevənlər dəvətlidir.
İlham İsmayıl 1957-ci ildə Tərtərin Sarıcalı kəndində doğulub. Bakı Dövlət Universitetinin jurnalistika fakültəsini və SSRİ Dövlət Təhlükəsizliyi Komitəsinin Minsk Ali Kursunu bitirib.
1982-ci ildən Dövlət Təhlükəsizlik Komitəsi (Milli Təhlükəsizlik Nazirliyi) sistemində xidmət edib. DTK-nın (MTN) Gəncə Şəhər Şöbəsində əməliyyat müvəkkili, baş əməliyyat müvəkkili postlarında çalışıb. Gəncəbasar bölgəsinin erməni işğalçılarından azad olunmasında fəal iştirak edib. MTN-in Şəmkir və Göyçay bölmələrinin rəisi, Milli Təhlükəsizlik Nazirliyində şöbə rəisi olub. 1995-ci ildən ictimai-siyasi fəaliyyətlə məşğuldur.
“KQB-MTN… Görünən dağın bələdçiliyi” kitabında İlham İsmayıl xüsusi xidmət orqanlarında qulluq edərkən şahidi və iştirakçısı olduğu ictimai-siyasi hadisələrdən, Qarabağ müharibəsindən, xüsusi xidmət orqanlarının ölkənin həyatındakı rolundan söz açır.
