Bank hesabı açmadan xarici valyutada pul köçürmək yasaqlandı
Mərkəzi Bankın İdarə Heyəti Azərbaycan Respublikasının rezident və qeyri-rezidentlərinin xarici valyuta əməliyyatları aparması qaydalarını təsdiqləyib. Yeni qaydalara əsasən, bank hesabı açmadan Azərbaycan Respublikasının daxilində və ölkədən kənara xarici valyutada pul köçürməsini yalnız rezident və qeyri-rezident fiziki şəxslər apara bilər. Bank hesabı açılmadan xarici valyutada pul köçürməsi əməliyyatlarına yol verilmir.
Rezident və qeyri-rezident fiziki şəxsin xeyrinə bank hesabı açılmadan pul köçürməsi əməliyyatları üzrə daxil olan vəsait bankda məhdudiyyət olmadan qəbul edilir və ödənilir. Köçürülmüş xarici valyuta vəsaitləri vəsaiti alana nağd şəkildə verilir və ya onun tapşırığı ilə bank hesabına köçürülür.
Rezident və qeyri-rezident fiziki şəxs Azərbaycan Respublikasından kənara bank hesabı açmadan xarici valyuta vəsaitlərini bir əməliyyat günü ərzində 1000 ABŞ dolları, ay ərzində isə 10000 ABŞ dolları ekvivalentinədək məbləğdə köçürə bilər.
Rezidentlərin və qeyri-rezidentlərin xarici valyutada olan bank hesablarına nağd və nağdsız qaydada daxil olan xarici valyuta banklarda məhdudiyyət olmadan onların hesablarına mədaxil edilir.
AZƏRTAC-ın məlumatına görə, sənəd dekabrın 8-dən qüvvəyə minir.
