Qələbə həlak olmuş komandaya verildi
Cənubi Amerika Futbol Konfederasiyası Braziliyanın “Şapekoense” komandasını qitənin əsas klub turnirlərindən olan Sudamerikana kubokunun qalibi elan edib. Qərar turnirin ikinci finalçısının – Kolumbiyanın “Atletiko Nasyonal” komandasının xahişi əsasında qəbul olunub.
“Şapekoense” komandasının məşqçiləri və oyunçuları noyabrın 29-da baş vermiş təyyarə qəzasında həlak olub. Boliviyanın “Lamia” aviaşirkətinə məxsus təyyarə Kolumbiyada qəzaya uğrayıb. “Şapekoense” noyabrın 30-u bu ölkədə “Atletiko Nasyonal”la Sudamerikana kubokunun ilk final matçına çıxmalı idi. Qəzadan sonra “Atletiko Nasyonal” kubokun “Şapekoense”yə verilməsini təklif edib. Cənubi Amerika Futbol Konfederasiyası bu nəcib hərəkətə görə “Atletiko Nasyonal”a 1 milyon dollar mükafat təyin edib.
