Baş nazir prezidentlik yarışına girdi
Fransanın baş naziri, hakim Sosialist Partiyasının üzvü Manuel Vals prezidentliyə namizəd olmaq istədiyini bəyan edib. Novator.az-ın məlumatına görə, dekabrın 5-i İvri şəhərinin meriyasında çıxış edən baş nazir məramını rəsmən açıqlayıb.
Manuel Vals namizəd seçiminə qatıldığı üçün dekabrın 6-da baş nazir postundan istefa verib.
Prezident seçkisi gələn ilin yazında keçiriləcək. Sağ və mərkəzçi partiyaları prezident seçkisində təmsil edəcək namizəd seçimi başa çatıb. Prezidentlik uğrunda sabiq baş nazir Fransua Fiyon mübarizə aparacaq.
Sosialist Partiyasının namizəd seçimi gələn il yanvarın 22-si və 29-da keçiriləcək. Bu partiyanın liderlərindən dövlət başçısı Fransua Oland dekabrın 1-də prezident seçkisində namizəd olmayacağını açıqlayıb. Fransua Oland deyib ki, dövlət başçısı seçilməzdən əvvəl verdiyi vədlərin hamısının vaxtında və tam gerçəkləşməsi mümkün olmayıb, bəzi işlər görülməsi zamanı isə səhvlərə yol verilib. Bir çox səbəbdən populyarlığının aşağı düşdüyünü etiraf edən Fransua Oland prezident seçkisinə qatılmaq istəmədiyini vurğulayıb.
1962-ci ildə İspaniyada doğulan Manuel Vals 20 yaşında Fransa vətəndaşlığı alıb. 2002, 2007 və 2012-ci illərdə parlamentin aşağı palatasının deputatı seçilib. 2012-ci ildə daxili işlər naziri təyin olunub. Baş nazir postuna 2014-cü ilin aprel ayında gətirilib.
