Qalmaqallı prezident seçkisini professor uddu
Avstriyada qalmaqallı prezident seçkisi başa çatıb. Mayın 22-də keçirilmiş ikinci turda Yaşıllar Partiyasının dəstəklədiyi iqtisadçı professor Aleksandr Van der Bellen udmuş, amma nəticələr onun Azadlıq Partiyasından rəqibi Norbert Hoferin şikayəti əsasında ləğv olunmuşdu.
Novator.az-ın məlumatına görə, dekabrın 4-də yeni səsvermə keçirilib. İlkin nəticələrə əsasən, Aleksandr Van der Bellen 51,7 faiz səslə qalib gəlib. Norbert Hofer 48,3 faiz səs yığıb.
Aleksandr Van der Bellen 1944-cü ildə Vyanada doğulub. Atası holland əsilli rus, anası estondur. İkinci Dünya müharibəsi dövründə ailə Estoniyadan Avstriyaya mühacirət edib.
Aleksandr Van der Bellen 1970-ci illərdə Sosial Demokrat Partiyasına qoşulub, daha sonra Yaşıllar Partiyasını seçib. 1994-2012-ci illərdə Avstriya parlamentinin aşağı palatasının, 2012-2015-ci illərdə Vyana Şəhər Məclisinin üzvü olub.
Avstriyada səlahiyyətləri məhdud olan prezident 6 il müddətinə seçilir. Eyni şəxs dalbadal iki dəfədən artıq prezident ola bilməz.
