Baş nazir istefa verir
İtaliyanın baş naziri Matteo Renzi istefa verəcəyini açıqlayıb. Novator.az-ın məlumatına görə, bu, dekabrın 4-də referenduma çıxarılmış konstitusiya islahatının dəstək qazanmaması ilə bağlıdır.
Matteo Renzi hökuməti referendumda konstitusiyanın Senatla bağlı müddəalarını dəyişdirmək istəyirdi. Təşəbbüsə əsasən, Senat üzvlərinin sayı 315-dən 100-ə düşürülməli, senatorlar ümumxalq seçkisində deyil, bölgə məclislərində seçilməli və təyin olunmalı idi. Layihədə 95 senatorun bölgə məclislərində seçilməsi, 5 senatoru prezidentin təyin etməsi, yerli və mərkəzi hakimiyyət orqanları arasında səlahiyyətlərin yenidən bölüşdürülməsi nəzərdə tutulurdu. Senatın qanunların qəbulunda iştirakını minimuma endirmək, hökumətə etimadsızlıq göstərmək səlahiyyətlərinin alınması da təklif olunurdu.
İlkin nəticələrə görə, seçicilərin 60 faizə yaxını konstitusiya islahatının əleyhinə səs verib. Referendumda məğlubiyyətinə baxmayaraq Matteo Renzi demokratiyanın zəfər çaldığını və İtaliya ilə qürur duyduğunu bəyan edib.
41 yaşlı Matteo Renzi Demokrat Partiyasının lideridir. O, baş nazir postuna 2014-cü ilin fevral ayında gəlib.
