Ermənistan-Rusiya qrupunun komandanı məqsədləri açıqladı
Ermənistan-Rusiya birləşmiş qoşun qrupunun komandanı general-mayor Andranik Makaryan jurnalistlərə açıqlama verib. Novator.az-ın məlumatına görə, general deyib ki, birgə qoşun qrupu Ermənistana və Rusiyaya təcavüzün qarşısını almağa, iki ölkənin ərazi bütövlüyünün və əhalisinin müdafiəsinə yönəlib.
Noyabrın 30-da Rusiya paytaxtı Moskvaya səfər edən Ermənistanın müdafiə naziri Vigen Sərkisyan həmkarı Sergey Şoyqu ilə iki ölkənin birləşmiş qoşun qrupunu yaratmaq barədə saziş imzalayıb. Sazişə əsasən, birgə qrupa Ermənistandakı 102-ci Rusiya hərbi bazası və Ermənistan Silahlı Qüvvələrinin hərbi hissəsi daxil olacaq.
General Andranik Makaryan qeyd edib ki, Ermənistanla Rusiya hərbi-siyasi vəziyyəti birgə analiz etməyə, ordu qrupunun heyətini və rəhbərliyini müəyyənləşdirməyə, birgə komandanlıq yaratmağa, vahid idarəçilik sistemi qurmağa, qoşunların, kəşfiyyatın, silahlanmanın, maddi-texniki bazanın idarəçiliyini təmin etməyə və operativ-taktiki tapşırıqların birgə yerinə yetirilməsinə öhdəlik götürüblər.
