Ermənistanda parlament sədrinin müavini postlarından biri müxalifətə verilir
Noyabrın 30-da Ermənistan parlamenti Milli Məclisin reqlamentini dəyişən qanun qəbul edib.
Novator.az-ın məlumatına görə, dəyişiklik parlamentin statusunun yüksəldilməsini nəzərdə tutur.
Əsas yeniliklərdən biri parlament sədrinin müavini postlarından birinin (Ermənistanda parlament sədrinin iki müavini olur) müxalifətə verilməsi barədə müddəadır.
Parlamentdə yeni orqan – Şura yaradılır. Şuraya parlamentin sədri, onun iki müavini, bütün fraksiyaların, eləcə də komissiyaların rəhbərləri daxildir. Parlament iclaslarının gündəliyini bu qurum müəyyən edəcək. Gündəliyin təsdiqi parlament sədrinin və onun müavinlərinin səlahiyyətində olacaq.
Ötən ilin dekabrında Ermənistan konstitusiyası dəyişib, ölkə parlament respublikası idarə üsuluna keçir. Yenilənmiş ana qanuna görə, gələn ildən hökuməti proporsional sistemlə seçilən 101 nəfərlik parlamentdə azı 53 mandatı olan partiya quracaq. İcra hakimiyyəti və dövlət idarəçiliyi sisteminə ümumi rəhbərliyi hökumət həyata keçirəcək. Silahlı Qüvvələr hökumətə tabe olacaq, müharibə vaxtı ali baş komandan vəzifəsinin icrası da baş nazirə keçəcək. Baş nazir postuna prezident parlament seçkisində qalib gəlmiş partiyanın nümayəndəsini təyin edəcək. Dövlət başçısını – Ermənistan prezidentini parlament 7 il müddətinə seçəcək.
Hazırda 131 yerlik Ermənistan parlamentində hakim Respublika Partiyasının 69 deputatı var. Hökumət ortağı Daşnaksütun Partiyası parlamentdə 5 deputatla təmsil edilir.
Müxalif qurumlardan Çiçəklənən Ermənistan Partiyası 33, Erməni Milli Konqresi 7, Orinats Yerkir Partiyası 5, İrs Partiyası 4 mandata sahibdir.
7 deputat heç bir fraksiyaya məxsus deyil.
