Azərbaycan-Rusiya hərbi əməkdaşlıq planı imzalanıb
Moskvada MDB Müdafiə Nazirləri Şurasının iclasında iştirak edən Azərbaycanın müdafiə naziri Zakir Həsənov noyabrın 30-u Rusiyanın müdafiə naziri Sergey Şoyqu ilə görüşüb. Görüşdə iki ölkə arasında hərbi və hərbi-texniki əməkdaşlığın inkişafı perspektivləri müzakirə edilib.
Sergey Şoyqu bildirib ki, iki ölkənin Müdafiə nazirlikləri beynəlxalq terrorla mübarizəyə qarşı birgə işləyirlər. O, hərbi əməkdaşlıq sahəsində nəzərdə tutulan planların yerinə yetirildiyini vurğulayıb.
Rusiyalı nazir deyib: “Bu gün Azərbaycan Xəzər regionunda təhlükəsizlik forpostudur. Ona görə də biz bu sahədə daha səmərəli əməkdaşlıq etməliyik. Ümid edirik ki, 2017-ci ildə iki ölkənin hərbi dəniz donanma komandanlığının Xəzərdə təhlükəsizlik məsələlərinin nizamlanması ilə bağlı strukturunun yaradılmasına nail olacağıq”.
Nazir Zakir Həsənov Azərbaycanla Rusiya arasında hərbi və hərbi-texniki sahədə əməkdaşlığın inkişaf etdiyini bildirib, bu görüşün hər iki ölkə üçün səmərəli olacağını deyib. O, hərbi kadrların hazırlanması məsələsinə toxunaraq bildirib ki, hazırda Rusiya ali hərbi məktəblərində 80-dən çox azərbaycanlı kursant təhsil alır.
Görüşün sonunda iki ölkənin Müdafiə nazirlikləri arasında 2017-ci il üçün əməkdaşlıq planı imzalanıb.
Xəbəri AZƏRTAC yayıb.
