Təyyarə qəzalarının qurbanı olmuş idmançılar
Braziliyanın “Şapekoense” futbol komandasının üzvləri noyabrın 29-u təyyarə qəzasında həlak olublar.
Novator.az bildirir ki, əvvəllər də futbol komandalarına ağır itkilər gətirən təyyarə qəzaları baş verib.
4 may 1949-cu ildə İtaliyanın “Torino” komandasının 18 futbolçusu təyyarə qəzasına qurban gedib. 6 fevral 1958-ci ildə İngiltərənin “Mançester Yunayted” komandasının 8 futbolçusu, 16 iyul 1960-cı ildə Danimarkanın ikinci yığmasının 8 futbolçusu təyyarə qəzasında həlak olub.
3 aprel 1961-ci ildə Çilinin “Qrin Kross” komandasının üzvləri, 26 sentyabr 1969-cu ildə Boliviyanın “Stronqest” komandasının 19 futbolçusu və klubun rəhbərləri, 11 avqust 1979-cu ildə Özbəkistanın “Paxtakor” komandasının 17 üzvü təyyarə qəzasında ölüb.
8 dekabr 1987-ci ildə Perunun “Alyans” futbol komandasının heyəti, 7 iyun 1989-cu ildə Hollandiya klublarının 18 futbolçusu, 27 aprel 1993-cü ildə Zambiya milli komandasının 18 üzvü təyyarə qəzasının qurbanı olub.
Başqa idman növlərinin də aviasiya qəzalarında qurbanları var.
18 noyabr 1948-ci ildə Çexoslovakiya milli xokkey komandasının 6 oyunçusu, 5 yanvar 1950-ci ildə VVS SSSR komandasının 8 xokkeyçisi, 15 fevral 1961-ci ildə ABŞ fiqurlu konkisürmə yığmasının 34 üzvü və məşqçilər, 13 oktyabr 1972-ci ildə Uruqvayın reqbi yığması, 29 noyabr 1975-ci ildə “Formula 1” yarışlarının İngiltərədən olan 6 iştirakçısı, 14 mart 1980-ci ildə ABŞ milli boks yığmasının 22 üzvü, 24 avqust 2008-ci ildə İranın voleybol üzrə yeniyetmə milli komandasının 17 üzvü, 15 iyul 2009-cu ildə İranın yeniyetmələrdən ibarət cüdo milli komandasının üzvləri, 7 sentyabr 2011-ci ildə Rusiyanın Yaroslavl şəhərinin “Lokomotiv” xokkey komandasının üzvləri təyyarə qəzasında həyatını itirib.
